Gizateak eta Errenteriako Udalak hitzarmena sinatu dute erosketa publiko arduratsua sustatzeko

Por Gizatea

el 01-02-2022

Otsailaren 1ean, Gizatea eta Errenteriako Udalaren arteko lankidetza-hitzarmena sinatu egin da, erosketa publiko arduratsua eta Laneratzeko Enpresei Erreserbatutako Kontratuak sustatzeko.

Lankidetza horren bidez, esperientzia pilotu bat jarriko da abian, Udalak datozen bi urteetan egingo dituen kontratuen aurreikuspena aztertzeko eta laneratzeko enpresentzat erreserbatu daitezkeenak identifikatzeko.

Legez, nahitaezkoa da administrazio publikoek lizitazio jakin batzuetan parte hartzeko eskubidearen erreserba-portzentaje bat finkatzea enpresa mota jakin batzuei, besteak beste, Laneratzeko Enpresei. Gainera, herri-administrazioek gutxieneko baldintzak ezarri behar dituzte erreserba betetzen dela bermatzeko.

Aizpea Otaegi alkateak adierazi du agintaldi planean jasota dagoela kontratazioaren baitan klausula sozialak lantzea, eta Laneratzeko Enpresa zein gizarte-ekimeneko enplegu-zentro bereziei erreserbatutako kontratuen gaineko gogoeta egitea. Gaineratu du horiek ahalbidetzea urrats garrantzitsua dela kontratazio publikoa beste termino batzuetan ulertzeko eta beste balio batzuen gainean eraikitzeko. “Azkenean gizarte berdinzaleagoa, inklusiboagoa eta ekitatean oinarritutakoa eraikitzeko bidean garrantzitsua da aukerak sortzea enpleguratzeko garaian zailtasun handienak dituzten pertsonentzako” – azaldu du alkateak. Gainera, gogorarazi du Errenteriako Udalak baduela esperientzia esparru honetan, hain zuzen ere eskualdeko lau udalerrien artean sortu eta sustatzen den Badia Berri Gizarteratze Enpresa Gizateako kide baita.

Gizateako Gipuzkoako ordezkari den Iune Polok azaldu du hitzarmen hau garrantzitsua dela Gizatearentzako; izan ere, orain arte Gizarteratze Enpresak sustatzea entidade sozialetan eta haien lanean oinarritu da, baina beharrezkoa da beste aurrerapauso bat ematea Gipuzkoan, eta Gizarteratze Enpresa gehiago sortzea denen arteko elkarlanean oinarritu behar da eta hor elkarlan publiko-pribatu bat behar da. Hitzarmen honek hori ahalbidetzen duela adierazi du, kasu honetan Errenteriako Udalarekin.

Bestalde, Joana Revilla Gizatea elkarteko koordinatzaileak azaldu duenez, lankidetzarako aukera hori Gipuzkoako Foru Aldundiaren Elkar Ekin Lanean Estrategiaren esparruan sortu da, Gizateak 2021ean gauzatutako EREIN proiektuaren bidez, laneratzeko enpresa berriak edo lurraldean dauden laneratzeko enpresentzako jarduera-lerro berriak sortzea bultzatzeko. Horretarako, hainbat ildo landu dira; alde batetik, bazterkeria-egoeran edo -arriskuan dauden pertsonen enplegu inklusiboa sustatzeko eragile publiko, sozial eta pribatuen ekosistema sortzea, eta, bestetik, sektore pribatuari eta sektore publikoari lotutako laneratzeko enpresak sortzeko negozio-aukerak edo merkatu-nitxoak identifikatzea, erosketa publiko arduratsuaren bidez.

Amaitzeko, bi erakundeek azpimarratu dute espero dutela lankidetza hori baliagarria izatea egoera ahulenean dauden eta lan-merkatu arruntera iristeko zailtasun gehien dituzten kolektiboentzako lan- eta gizarteratze-aukerak sortzeko, esparru horretan lan egiten baitute Laneratze-Enpresek.