el 12-03-2026
Lorena Axpe, Gizartelur laneratze enpresaren kudeatzailea harrera egiten digu.
“Gizatearen parte izateak laguntza garrantzitsua suposatzen du Gizartelurrentzat bere jarduera garatzeko orduan. Sareak orientazioa eta laguntza eskaintzen ditu laneratze-enpresa baten eguneroko jardunean sortzen diren behar askori erantzuteko, eta baita ekoizpeneko teknikariei zein laneratze-teknikariei zuzendutako laguntza espezifikoa ere...“
Nola sortzen da Laneratzeko Enpresa hau eta zein da bere jarduera nagusia?
Gizartelur S.L.. 2019an sortu zen, Cáritas Diocesana de Bilbao erakundeak sustatutako laneratze enpresa gisa, egoera ahulean dauden edo bazterketa-arriskuan dauden pertsonen gizarteratzea eta laneratzea sustatzeko helburuarekin.
Gaur egun bi jarduera-ildo ditugu. Alde batetik, enpresei zerbitzu osagarriak eskaintzen dizkiegu, bereziki industriaren sektorean, industria-tresneriaren ontziratze, estutxatze eta etiketatze-lanak eginez. Bestetik, eraikuntzaren arloan ere jarduten dugu, eraikinen mantentze-lanak eta obra txikiko lanak eginez. Bi jarduera horien garapenaren bidez, enpresak enplegu eta prestakuntza aukera berriak sortzen ditugu, lan-merkatura sartzeko zailtasun handiagoak dituzten pertsonen integrazioa erraztuz.
Nolakoa izan da enpresa-proiektuaren bilakaera orduz geroztik?
Enpresa-proiektuaren bilakaera, hasieratik bertatik, ez da zailtasunik gabea izan. Urte hauetan zehar, Gizartelurrek bere jarduera-ildoak egokitzen eta berriro definitzen joan da, merkatuak eskaintzen zituen aukeren eta proiektuen bideragarritasunaren arabera.
Hasierako garaietan gaur egungoetatik desberdinak ziren ekimenak bultzatu ziren. Horien artean nabarmendu zen barazki eta fruta produktu ekologikoen laborantza eta ekoizpena; jarduera horrek proiektuaren lehen urratsak markatu zituen, eta bere marka propioa ere izan zuen: Biozaki. Era berean, ehungintza-sektoreari lotutako jarduera-ildo batean ere lan egin zen, Ternua bezalako markekin elkarlanean. Hala ere, jostura-prozesuetako zailtasun teknikoek, besteak beste, jarduera horren jarraipena bideraezin bihurtu zuten.
Denborarekin, enpresak bere jarduera gaitasunekin bat datozen eta iraunkorragoak diren ildoetara bideratu du, enpresei eskaintzen dizkien zerbitzu osagarriak eta eraikuntzaren, erreformen eta eraikinen mantentze-lanen arloko jarduerak sendotuz.
Nortzuk dira enpresara heltzen diren langileak?
Gizartelurrera sartzen diren pertsonak, kasu askotan, aurretik Cáritas Diocesana de Bilbao-k Arizen duen Lan Aurreko Inklusio Zentroan beren gaitasunak garatu dituzten parte-hartzaileak izaten dira. Espazio horretan gaitasun soziolaboralak lantzen dituzte eta enplegurako beharrezkoak diren oinarrizko ohiturak eskuratzen dituzte, hala nola errutinak hartzea, talde-lana, puntualtasuna, ordena edo garbitasuna.
Gizartelur erdiko puntu batean kokatzen da, ingurune industrialetik eta lan-merkatu arruntetik gertuago. Aurretik landutako oinarri horretatik abiatuta, enpresak pertsonei laguntzen die haien enplegagarritasuna hobetuko duten gaitasun berriak garatzen, besteak beste hizkuntza ikasi edo hobetzea, hainbat motatako orga jasotzaileak erabiltzeko ikastaroak egitea edo lan-merkatura sartzea erraztuko duten ziurtagiri profesionalak lortzea.
Pertsona askok Arizeko zentrotik datozen arren, Cáritas Diocesana de Bilbao-ren Enplegu Azeleragailutik bideratutako parte-hartzaileak ere sartzen dira, baita lan-merkatura sartzeko zailtasun bereziak dituzten pertsonak ere.
Ba al dago parteatu nahi duzuen proiekturik edo jarduera berririk?
Aurtengo erronka nagusietako bat Gizartelurrentzat bere jarduera industrialaren arloari balio handiagoa ematea da. Ildo horretan, lan-modalitate berriak jarri dira martxan, epe ertain eta luzera produktibitatea hobetzea eta zerbitzu-ildo hori sendotzea ahalbidetuko dutenak. Era berean, enpresak hazten jarraitzea planteatzen du eta, ahal den neurrian, industriari laguntza emateko lanerako espazioak handitzea.
Bestalde, eraikuntzari, erreformei eta ofizioei lotutako jarduera-ildoaren barruan, duela gutxi mantentze-lanak hasi dira ikastetxe batean. Esperientzia oso positiboa izaten ari da, eta instalazioen mantentze-lanen arloan aukera berriak zabaltzeko bidea irekitzen du.
Zer nolako ekarpen egiten dio laneratzeko enpresari Gizateako bazkide izateak?
Gizatearen parte izateak laguntza garrantzitsua suposatzen du Gizartelurrentzat bere jarduera garatzeko orduan. Sareak orientazioa eta laguntza eskaintzen ditu laneratze-enpresa baten eguneroko jardunean sortzen diren behar askori erantzuteko, eta baita ekoizpeneko teknikariei zein laneratze-teknikariei zuzendutako laguntza espezifikoa ere.
Gainera, Gizateako kide izateak helburu bera partekatzen duten erakundeen arteko elkarlana eta batasuna sustatzen du: zaurgarritasun-egoeran dauden edo enplegua eskuratzeko zailtasun bereziak dituzten pertsonen gizarte- eta laneratzea erraztea. Gure lana etengabeko erronka da, eta sare honen barruan dagoen laguntza eta esperientzia partekatua izateak bidea argiagoa, errazagoa eta eramangarriagoa egiten du.