el 29-06-2026
Harrera egiten digute Inés Jiménezek eta Pepe San Josék, hurrenez hurren, Koopera Zaintzalan laneratze enpresaren koordinatzaile eta txertatze-prozesuko laguntza teknikaria.
“Koopera Zaintzalan sareko lanean eta elkarlanean sinesten dugu. Gizatea da beste gizarteratze-enpresa batzuekin modu koordinatuan eta parte-hartzailean lan egiteko aukera eskaintzen digun gunea...“
Nola sortzen da Laneratzeko Enpresa hau eta zein da bere jarduera nagusia?
Koopera Zaintzalan 2010ean sortu zen, Cáritasek zaintza-arloan zegoen ezkutuko enpleguarekiko zuen kezkaren ondorioz. Horren harira, pertsonen arretari buruzko prestakuntza bat antolatu zen, eta ikastaroko bi parte-hartzailerekin batera, ni irakasle nintzela, zaintza-enpresa bat sortzeko abenturan murgildu ginen. Helburua zen Etxez Etxeko Laguntza Zerbitzua (SAD), mediku- edo ospitale-laguntzak, gestioak eta garbiketa-zerbitzuak eskaintzea.
Nolakoa izan da enpresa-proiektuaren bilakaera orduz geroztik?
2010ean sortu ginen kooperatiba gisa, Cáritasen eskutik, eta 2015ean Koopera taldeko kide izatera igaro ginen. Urte bereko urtarrilaren 28an, Lanbidek Koopera Zaintzalan Koop. S. gizarteratze-enpresa gisa kalifikatu zuen.
Kooperatiba eta gizarteratze-enpresa berri hau Zaintzalan Koop. ELK eta Alkar Biziz S.L.U. enpresen bat-egitetik sortu zen (gogoratu Alkar Biziz ere gizarteratze-enpresa zela). Horrela, «Neurrira egindako zaintzak» zerbitzuak kooperatiba eta gizarteratze-enpresa bakar batean batu genituen, hiru jardun-esparrutan: egoitza-zerbitzuak, Etxez Etxeko Laguntza Zerbitzua (SAD) eta laguntza-, garbiketa- eta mantentze-zerbitzuak.
Nortzuk dira enpresara heltzen diren langileak?
Gaur egun, 11 bazkide gara, eta 19 pertsona gizarteratze-prozesuan daude. Horietatik %70 emakumeak dira; talde osoaren %75ek 36 eta 65 urte bitartean ditu, eta %70 pertsona migratuak dira.
Ba al dago parteatu nahi duzuen proiekturik edo jarduera berririk?
Kooperaren 25 urte baino gehiagoko ibilbideari eta esperientziari eusten diegu, berdintasunean oinarritutako laguntza eta pertsonen autonomia sustatuz.
Honako hauek izan nahi dugu: SENTIKORRAK, pertsona bakoitzaren ikuspegia erdigunean jarriz; IRISGARRIAK, pertsona guztientzat hurbileko hizkuntza eta gertuko jarrera eskainiz; PROZESUETAN OINARRITUAK, pertsona bakoitzaren prozesuaren erritmoak errespetatuz; ORAINEAN, etorkizunerantz urrats sendoak emanez; eta EKOLOGIKOAK, pertsona bere komunitatearekin harremanetan jarriz.
Zer nolako ekarpen egiten dio laneratzeko enpresari Gizateako bazkide izateak?
Koopera Zaintzalan sareko lanean eta elkarlanean sinesten dugu. Gizatea da beste gizarteratze-enpresa batzuekin modu koordinatuan eta parte-hartzailean lan egiteko aukera eskaintzen digun gunea. Horrela, informazioa inolako mugarik gabe partekatzen da, eta ezagutza ikuspegi eta gaitasun desberdinak batuz sortzen da. Horrek aberastasun handia dakar guretzat.