el 22-11-2023
Ekonomia sozialeko astea
Azaroaren 13tik 17rako astean, Gizarte Ekonomiari buruzko Europako Konferentziak eta FESLAN Eusko Jaurlaritzaren Gizarte ekonomiaren Enplegu Azokak markatu dute.
Gizarte Ekonomiako europar Konferentzia: Pertsonak, Planeta, Ekintza
Azaroaren 13an eta 14an Gizarte Ekonomiari buruzko Europako Goi Bilera egin zen Donostian. 500 aditu baino gehiago bildu ziren, eta 19 gobernuk eta Social Economy Europe-k sinatu zuten Donostiako Manifestua.
Kursaalen egindako “Gizarte Ekonomia: Pertsonak, Planeta, Ekintza” Europako Konferentzian Nicolas Schmit Europako Enplegu eta Gizarte Eskubideetako komisarioa izan zen, eta ziurtatu zuen etorkizuneko ekonomia dagoela jokoan, ekonomia jasangarriagoa eta erresilientzia hobeto lantzeko aukera ematen duena.
Gainera, Europar Batasuneko eta nazioarteko beste erakunde batzuk ere egon ziren ordezkatuta, hala nola Eskualdeetako Komitea edo Lanaren Nazioarteko Erakundea (LANE), Europako Ekonomia eta Gizarte Komitea edo Global Social Economy Forum (GSEF), besteak beste. Victor Meseguer Espainiako Gizarte Ekonomiarako Komisionatu Berezia ere izan genuen gurekin.
Goi-bilera Erakundeek eta 19 herrialdek Europan Gizarte Ekonomia indartzeko Donostiako Manifestua sinatuta amaitu zen.
FESLAN, Feria de Empleo y Congreso de la Economía Social
“Gizarte Ekonomiaren etorkizuna zu zara” lelopean, azaroaren 16an eta 17an FESLAN Gizarte Ekonomiako Enplegu Azoka egin zen, Eusko Jaurlaritzako Lan eta Enplegu Sailak antolatuta. Inaugurazioan Eneko Goia Donostiako alkatea, Jose Antonio Asensio Gipuzkoako Jasangarritasun diputatua eta Maravillas Espín Lan Ministerioko Gizarte Ekonomiako zuzendari nagusia izan ziren.
Topaketaren protagonistak Euskal Gizarte Ekonomiako familiak osatzen dituzten erakunde eta enpresak izan ziren, “Euskal Gizarte Ekonomia Sarean” (EGES) ordezkatuak.
Antolatutako ekitaldien artean, “Laneratzeko enpresak, gizarte inklusiboago baterako profesionalak” mahai-ingurua egin zen, Joana Revilla Gizateko koordinatzaileak moderatuta. Bertan, honako hauek parte hartu zuten: Sergio Bravo, Eskuz Esku gizarteratze-enpresako gerenteak, Alazne Palacín, Sokaire Servicios de Limpieza gizarteratze-enpresako gerenteak eta Adrian Cid, Emaús Gipuzkoako laneratzen laguntzeko teknikariak.
Aldi berean, gizarte-ekonomiako erakunde eta enpresen enplegu-azoka egin zen, eta bertan laneratzeko enpresak egon ziren ordezkatuta, Peñascal Kooperatiba, Emaus Gizarte Fundazioa eta Kooperaren standekin.
